Description
Rassie: Stories oor rugby en die lewe, die memoires van Rassie
Erasmus, sal deur Pan Macmillan SA in Suider-Afrika en deur Pan
Macmillan UK in die res van die wêreld uitgegee word.
Pan Macmillan SA maak met trots bekend dat Rassie: Stories oor rugby
en die lewe, geskryf deur Rassie Erasmus in samewerking met David
O’Sullivan, in die derde kwartaal van 2023 sal verskyn. Rassie se
memoires sal in gedrukte en digitale formaat deur Pan Macmillan SA in
Suider-Afrika en deur Pan Macmillan UK in die res van die wêreld
vrygestel word.
Rassie Erasmus is al geniaal genoem. Hy is al roekeloos genoem. Nog sy
lewe lank het hy dinge anders gedoen. Nou sal Rassie op sy
kenmerkende openhartige manier gesels oor sy lewe vol voorspoed en
teëspoed, op en weg van die rugbyveld – as Springbokspeler, provinsiale
afrigter, en as die hoofafrigter wat die nasionale span na die
Rugbywêreldbeker-sege in 2019 en ook in die aanloop tot 2023 se Wêreldbeker gelei het. Hy sal terugkyk op sy
loopbaan as speler en afrigter, iemand wie se ingebore rugby-instink, vermoë om ’n wedstryd anders te lees en
aptyt vir harde werk hom nog altyd onderskei het, en gelei het tot omstredenheid en mislukking, maar ook
dawerende sukses.
Rassie werk saam met die bekende joernalis David O’Sullivan om sy lewensverhaal te vertel. David is ’n
bekroonde skrywer en omroeper. Hy het ’n weeklikse rugbyprogram en regstreekse rugbyuitsendings op SABC-
TV behartig, en ook vir Capital Radio, 702, Hot919, PowerFM en KayaFM gewerk, waar hy oor nuus en sport
verslag gedoen het.
“Dit is vir Pan Macmillan ’n voorreg om Rassie se memoires uit te gee. Sy persoonlike verhaal op en weg van
die veld, van jong seun tot speler en daarna afrigter, sal Suid-Afrikaners van alle agtergronde vermaak,
inspireer en boei. Rassie is ’n nederige baanbreker wat ’n reusebydrae tot die spel rugby en op ander terreine
gelewer het,” sê Terry Morris, besturende direkteur van Pan Macmillan SA.
Rassie Erasmus sê: “My rugbylewe, as speler en afrigter, was nog altyd in die openbare oog. My passie vir die
spel is daar vir almal om te sien. Baie mense het ’n opinie oor my. Maar baie min mense ken die ware ek. Dié
boek stel my in staat om vir julle te vertel wie ek werklik is.”